‘नेपथ्य’ साँगीतिक समूहलाई आइतबार मोरङको बिराटचोकमा दर्शकले ‘वान्समोर’को बर्षा गराएका छन् ।दुई घण्टासम्म लगातार गाएर पसिना–पसिना भएका गायक अमृत गुरुङले दर्शको वान्समोरको बर्षा थेग्न नसकेर थप तीनवटा गीत गाए । रेशम, रातो र चन्द्रसुर्य जंगी निसान हाम्रो र तालको पानी माछिले खाने उनले बोनसमा गाएका हुन् ।
स्थानिय सुकुना चलचित्र मन्दिरमा खचाखच भरिएका दर्शक विच कार्यक्रममा अघिल्लो कन्सर्टजस्तै गायक अमृतले फेरि पनि उपस्थित दर्शकहरुसँग विद्यालयलाई शान्ति क्षेत्र बनाउने अभियानमा सहयोग गर्न पटक पटक अनुरोध गर्दै गीत गाइरहे गाइरहे । साढे सातसय क्षमताको हलले नपुग्ने अवस्था भएपछि अन्तिम दिन टिकट काट्ने दर्शकलाई आयोजकले पचास प्रतिशत अतिरिक्त शुल्क लिएका थिए । यसो गर्दा पनि दर्शकको माँग अनुसार सिट उपलब्ध गराउन नसकिएको स्थानिय आयोजक रेडियो सारङ्गीले जानकारी दिएको छ ।
कार्यक्रमका लागि शनिबार विराटचोक आइपुगेको नेपथ्यलाई आइतबार विहान सबेरै हात हातमा राष्ट्रिय झण्डा बोकेर आएका स्थानीय वासिन्दाले पञ्चैबाजाको धुनसहित बजार परिक्रमा गराएका थिए ।
‘अहिले आएर हाम्रो मौलिक बाजाको संरक्षण गर्नुपर्छ भनेर यहाँका बासिन्दा एकजुट भएका छन्,’ पञ्चैबाजा संरक्षणमा लागेका वीरबहादुर बर्देवा भन्छन्, ‘त्यसयता लोप हुन लागेको पञ्चेबाजा संरक्षणमा सहयोग पुगेको छ ।’ ‘नेपथ्य पनि लोक संगीतमै आधारित ब्याण्ड भएको हुनाले उसको स्वागतमा हाम्रो आफ्नै संगीत र झाँकी प्रयोग गरेका हौं,’ स्थानिय आयोजक सारङ्गी एफएमका अजुर्न गजुरेल भन्छन्, ‘यसरी स्वदेशी स्वादलाई जोड्ने मौकाका रुपमा पनि यो अवसरलाई लिएका छौं ।’स्थानीय आयोजकका अनुसार कन्सर्टबाट उठेको रकमले द्वन्द्वमा परेका र पढ्न नसकेका बालबालिकाको शिक्षामा लगानी गरिने छ । त्यसका निम्ति शिक्षा विकास समितिसँग सहकार्य गर्ने उद्देश्य रहेको आयोजक अर्जुन गजुरेलले जानकारी दिए । बिराटचोकमा विभिन्न तहका सातवटा सरकारी र एघारभन्दा बढी निजी विद्यालय छन् ।
0 comments:
Post a Comment